Қазақстан мұсылмандары діни басқармасының төрағасы, Бас мүфти Наурызбай қажы Тағанұлы жұмыс сапарымен Ұлытау облысына келді. Сапар барысында Бас мүфти облыста бой көтергелі жатқан жаңа мешіттің іргетасын қалау рәсіміне қатысып, жамағатпен жүздесті.
«Жаңа мешіт – тек құлшылық орны ғана емес, ол – тәрбие мен тағылымның, білім мен бірліктің, ынтымақ пен ізгіліктің ордасы. Мұнда жастар пайдалы білім алып, дұрыс діни түсінікпен сусындап, жат ағымдардан қорғана алады. Бұл мешіттің ел ішіндегі тұрақтылық пен рухани даму жолында қызмет ететініне сенімдімін.
Аллаға шүкір, бүгінде елімізде 3 мыңға жуық мешіт халыққа қызмет көрсетуде. Бұл – халқымыздың руханиятқа деген сұранысының айғағы. Ұлытау жеріндегі жаңа мешіт – осы игі үрдістің жалғасы»,- деп атап өтті Бас мүфти.
Айта кетейік, қазіргі таңда Ұлытау облысында 33 мешіт пен 1 қайырымдылық мекемесі халыққа рухани қызмет көрсетуде. Облыс көлемінде 56 дін қызметкері өзіне жүктелген міндетті абыроймен атқарып келеді.
