Қызылжар мешітінің маңынан жаңа, заманауи үлгідегі кең ауқымды асхана ашылды. Жаңа нысан 300 адамға дейін қызмет көрсете алады. Бұл – көпшілік жиналатын, ауызбіршілік пен берекені арттыратын игі істің көрінісі.
Асхананың ашылуына жергілікті тұрғындар өз үлестерін қосып, демеушілік танытты. Халықтың қолдауымен жүзеге асқан бұл жоба – ауыл-аймақтың ынтымағы мен бірлігінің айғағы.
Ашылу салтанаты ерекше сән-салтанатпен өтті. Мерекелік іс-шарада ұлттық құндылықтарымызды ұлықтайтын дәстүрлі ойындар ұйымдастырылды. Атап айтқанда, көпшіліктің көзайымына айналған түйе палуан күресі, арқан тартыс және қой көтеру секілді спорттық сайыстар көрермендердің ерекше ықыласына бөленді. Бұл жарыстарға қатысқан жамағат өздерінің күш-қайратын сынап, халықтың қошеметіне ие болды.
Салтанатты іс-шара барысында ел ағалары мен мешіт имамдары сөз сөйлеп, бұл игі істің маңыздылығына тоқталды. Олар асхананың тек мешіт жамағатына ғана емес, барлық қала тұрғындарына қызмет ететінін атап өтті.
Жаңа асхананың ашылуы – бұл жай ғана әлеуметтік нысанның іске қосылуы емес, бұл – рухани, мәдени, ұлттық құндылықтарымызды дәріптейтін, халықты біріктіретін ортаға айналуына жасалған маңызды қадам. Осы игі іске атсалысқан барша азаматтарға алғысымыз шексіз.
