Қазақстан мұсылмандары діни басқармасы Ұлытау облысы өкілдігіне қарасты мешіттерде басталған «Имани жаз – 2024» жазғы діни сауат ашу курсының алғашқы легі өз мәресіне жетті.
Облысқа қарасты барлық мешіттерде сауат ашу курсының алғашқы легі аяқталуына орай сертификат табыстау ұйымдастырылды. Салтанатты шараларда мешіт бас имамдары шәкірттер мен ата-аналарды құттықтап, мақтау қағаздары мен сыйлықтарын табыстады.
Айта кетейік, мектеп жасындағы оқушылардың демалыс уақытын тиімді өткізу мақсатында бастау алған республикалық жобаның алғашқы легіне облыс бойынша 200-ден астам бала қатысып, «Имандылық әліппесі» кітабы негізінде Алланың көркем есімдері, мақал-мәтелдер, ғибратты әңгімелер мен ислам әдептерін оқыды, Құран әліпбиін үйреніп, таңдаулы дұғалар жаттады. Сонымен қатар сауат ашу курсы барысында футбол, садақ ату, атқа міну және т.б. спорттық ойындар, викториналық сұрақ-жауап сайыстары өткізіліп, түрлі мәдени орындарға саяхаттар жасалды.
