Қазақстан мұсылмандары діни басқармасы әйел-қыздар секторының меңгерушісі Нұрғалиева Динара Құтқожақызы және Астана қаласының әйел-қыздар секторының жетекшісі Бекет Гүлсара Мамырқызы іс-сапармен Ұлытау облысында болды.
Ұлытау облысының әйел-қыздар секторына жауапты маман Қожағазина Аяулым ұстаздың жетекшілігімен бірнеше айтулы іс-шаралар өтті.
Іс-сапардың алғашқы күні Сәтбаев қаласының әйел-қыздар жамағатына арналды. Ең алдымен “Отбасы – ұрпақтың алтын бесігі: Исламдағы әйелдің миссиясы” атты нәзік жандыларға арналған семинар ұйымдастырылды. Семинар аясында Динара Құтқожақызы мен Гүлсара Мамырқызы исламдағы әйелдің орны, отбасы құндылықтары, ана мен әйелдің қоғамдағы рөлі жайында тағылымды баяндамалар жасады.
Одан бөлек Елордадан келген қонақтармен біріге отыра сүбелі сұхбат құрылды. Подкаст түсірілімі “Исламдағы бала тәрбиесі” тақырыбында болды. Сұхбат барысында исламдағы бала тәрбиесінің маңыздылығы, ата-ана мен баланың өзара қарым-қатынасы, тәрбиенің негізгі қағидалары мен қазіргі қоғамдағы өзекті мәселелер талқыланды. Арнайы шақырылған қонақтар өз тәжірибелерімен бөлісіп, пайдалы кеңестер берді.
Іс-сапардың екінші күні Ұлытау облысының орталығы Жезқазған жерінде өтті. Облыс орталығында “Қазіргі мұсылман әйел: дәстүр мен заман ағымын қалай үйлестіреміз?” тақырыбында семинар өтті. Семинар барысында қонақтар қазіргі мұсылман әйелінің дәстүр мен заман талабын қалай үйлестіре алатыны жайлы өзекті тақырыптарды қозғады. Нұрғалиева Динара Құтқожақызы мен Бекет Гүлсара Мамырқызы әйелдің отбасы мен қоғамдағы рөлі, рухани тәрбие мен құндылықтар жөнінде мазмұнды баяндамалар жасады.
Кешкісін “Арулар ауызашары: Жүректер тоғысқан мейірім кеші” атты рухани кеш ұйымдастырылды. Оразаның берекесін сезіндіру мақсатында ұйымдастырылған бұл ауызашар кешіне 205 нәзік жан қатысты. Кеш аясында рухани насихаттар айтылып, пайдалы уағыздар тыңдалды. Қатысушылар тек рухани азық алып қоймай, көңілді ойындарға қатысып, түрлі сыйлықтарға ие болды.
Бұл ерекше кештің басты сәттерінің бірі – мешітіміздің әйел мәйіттерін жуындыратын, осы салада 20 жылдан астам қызмет етіп келе жатқан апамызға Умраға жолдама табысталуы болды. Бұл жан тебірентерлік сәт жиналған қауымды ерекше әсерге бөлеп, Рамазан айының шынайы мейірімділік пен ізгілік айы екенін тағы бір дәлелдеді.
Сонымен қатар, кеш барысында қазақтың дәстүрлі өнері дәріптеліп, домбырашылар күй тартып, жетігеншілер әуезді ән арнады, ал қазақ қыздары қазақша би билеп, кештің сәнін келтірді. Осылайша, ұлттық мәдениет пен руханият үйлесім тауып, шара ерекше есте қаларлық деңгейде өтті.
Бұл іс-шаралар Ұлытау облысындағы мұсылман әйелдерінің бірлігін нығайтып, олардың рухани және мәдени дамуына үлкен серпін берді. Ұйымдастырушылар алдағы уақытта да осындай игі бастамаларды жалғастыруды жоспарлап отыр.
