Ұлытау облыстық «Ахмет ишан Оразайұлы» мешітінде Республикалық бата беру байқауына іріктеу сайысы өтті.
Сайыстың шымылдығы қасиетті Құран оқумен басталды. Кейін облыстың бас имамы Бейбіт Бақытжанұлы сөз сөйлеп, қасиетті Рамазан айымен құттықтап, игі дәстүрді жалғастырушы қатысушы ақсақалдарға сәттілік тіледі. 9 адам қатысқан ақсақалдардың облыстық бата сайысына Жезқазған қалалық ақсақалдар кеңесінің төрағасы Мұрат Сүтенұлы, «Балмағамбет Балқыбайұлы» мешітінің наиб имамы Сенбіғали Жағыпарұлы және Тұңғышбай қажы атамыз төрелік етті. 2 кезеңнен тұратын сайыста ақсақалдар билеттер алып, әртүрлі бата түрлерінен өзара бақталасты. Екінші кезеңде салт-дәстүрге байланысты сұрақтарға жауап берді.
Жарыс қорытындысы бойынша Нарбаев Қуанышбек ақсақал жеңімпаз атанып, 50 000 теңге сертификат пен диплом алды. Сонымен қатар Қуанышбек ақсақал Республикалық байқауда облыс намысын қорғайтын мүмкіндікке ие болды. Жүлделі 2-орынды [30 000 теңге] Ержанов Мұқажан ақсақал, 3-орынды [20 000 теңге] Кушенов Бақыт қажы иеленді. Қалған белсенді қатысушыларға 10 000 теңге ақшалай сертфикаттар табысталды.
