Ұлытау облысының Жезқазған қаласында қала әкімінің төрағалығымен әкімдік ғимаратында кеңейтілген кездесу өтті. Басқосуға облыстың бас имамы, мәслихат депутаттары, қоғамдық кеңес мүшелері және ақсақалдар алқасының өкілдері қатысты.
Кездесу барысында Қазақстан мұсылмандары діни басқармасының «Qamqor-Sharapat» орталығының республика бойынша атқарып жатқан жұмыстарымен таныстыру жүргізілді. Атап айтқанда, мұсылман зираттарын бірізділікке келтіру, діни рәсімдерге қатысты түсіндіру жұмыстарын жүйелеу және халыққа қызмет көрсету бағытындағы жобалар талқыланды.
Жиын қорытындысында қатысушылар келесі жылдан бастап Жезқазған қаласындағы мұсылман зираттарын «Qamqor-Sharapat» орталығына сенімгерлік басқаруға беру жөнінде бірауыздан келісімге келді.
