ҚМДБ Ұлытау облысы өкілдігінің ұйымдастыруымен РАНТ мүшесі, «Балаби қари» құран жаттау орталығының директоры Арман Қуанышбаев ұстаз Жезқазған жерінде бірнеше іс-шараға қатысты.
Жезқазған төріндегі шараның басы жергілікті ардагерлермен кездесуден басталды. «Ардақты Пайғамбарымыз (оған Алланың салауаты мен сәлемі болсын) хадистерінің бірінде: «Үлкенге құрмет, кішіге ізет көрсетпеген – бізден емес», – деген. Дана халқымыз үлкенге қарап бой түзеген. Алдыңғы буыннан үлгі ала отырып, соларға ұқсап бағуға тырысқан. Әлі күнге осы ізет-иба ұрпақтан ұрпаққа жалғасып, алдымен үлкендерге жол беріп, батасын алуға тырысып келеміз» деді білікті ұстаз.
Кейінгі кездесу Ұлытау облыстық «Ахмет ишан Оразайұлы» мешітінің жамағатымен өтті. Алдымен әйел-қыздар секторының ұйымдастыруымен насихат ұйымдастырылып, «отбасы мәселелерінде» біршама өзекті сұрақтарға жауап қайырылды. Ал ақшам намазынан соң ерлерге «мешіт – рухани мектеп» тақырыбында уағыз айтылды.
